Acts 19

Pol dumo Epesus molo kandja dje una awi

1Apolos dumo Korin moi poke ge Pol dumo kamkimb al wane kere er dumo Epesus pi. Po wane pillgi dji una pende kane 2embe dji, ye Jisas boll pillgi dji ge God Murble ye boll woi mo man ne? dji. Kambono embe dji, man, God Murble moro mo namoro ge una dji napupin we dji. 3Djimaka, Pol embe dji, ye nu pai ge namba mal pai ne? dji. Kambono embe dji, nu papin ge Jon kandja dji mal ge nu papin we dji.

4Djimaka Pol embe dji, Jon nu pagle awi ge una nomane ake to embe moye dje nu pagle awi. Ba Jon embe dji, are iwa ta wonda ye une kandjiye al ge pillgi djine we dji. Dji mal ge ye Jisas pillgi djine dje dji. 5Pol kandja embe dje awika, kambono Iwa Kerman Jisas kandjiye al ge nu pai. 6Pamaka Pol kambono moi al wo gaklene abika, God Murble wo kambono moi al moika, una kandjine kayekaye pai mal ge dji. Alla, propet kandja dji mal para embe dji. 7Una embe yei ge iwa 12-pela mal embe moi.

8Pol takene sokara molo, Juda una lotu numb yei al numog po God dumoye kantau yendo mal ge une kandja yembe ye dje una awi. 9Ba una pende man dje, pillgi nadji. Ga pene po una merke moi al Jisas kondwe yero mal ge dje kamblo kal woro awi. Kandja embe dji pille Pol pillgi dji una boll aike molo Juda una lotu numb kaima kere er pi. Po numb kandjiye Tiranus we dji ge kambono ege ege po molmaka, Pol kandja dje una awi. 10Une kandja dje molo pika kognumb soka er wo pi. Juda una ne, Grik una porapora propins Esia moi ge, God Iwa Kerman kandjiye po wai dje keri.

Iwa Skewa warye kambono po kum ke ta moi i worbon dje yei

11God Pol agle al wal dongall ta mal kayekaye yei. 12Yene laplap kembis kandjiye ankisip we dji ne, wal konkunom une woro wani kon ge, una kon ge ipo una ke toi moi al aumaka, kambono ke to pai ge pora djika, alla una kubene al kum ta pai ge kere er orko pi.

13Dumo yei ge Juda una pende wane molo kum pai una moi al po kandja djimaka, kum pakna pai ge alla kere er orko pi. Kambono kogo embe yei ge ku i nono yei. Embe ye molmaka, yenekne una pende embe dji, Iwa Kerman Jisas kandjiye al ge kum ta moya ge dje orko worbon we dji. Dji mal ge kum pai una moi al ge kambono po embe dji, Pol kandja dje aundo iwa Jisas ge yene kandjiye al ge no kum pakna moro ge dje orko wornmon we dje kandja su embe ye wani. 14Una embe ye moi ge iwa Skewa we dji ta moi yene warye 7-pela po embe ye moi. Iwa Skewa ge, une Juda una opa gale awi una kerman moi. 15Kum pai iwa ta moi al iwa 7-pela ge po embe dji, no Iwa Kerman Jisas kandjiye al djinmon, ni kum pakna moren ge wo er orko piye! dji. Dji ba kum pakna moi ge embe dji, na Jisas kando alla na Pol para kando ba, ye una ne mal mor ne? dji. 16Djika iwa ge plo dje iwa 7-pela to derpall yei. Kambono konne kunomne amblo ball dje, to meyam i awika, iwa 7-pela gaklene kiwa yeika, numb ge kere seke er pi. 17Una 7-pela po embe yei ge una pille kandjambe tomaka, dumo Epesus Juda una ne, Grik una porapora pille kand golo, Iwa Kerman Jisas kandjiye ge pille pla yei. 18Una merke nomane ake to Jisas pillgi dje, yenekne singare ke ye wani mal ge una nalene al dje pene woro embe yei. 19Una merkeke kum pa, kudja ye moi una ge yenekne nomane ake to, una kum pai buk ne, una kudja yenj buk ge iwo, una nalene al wamo gale sege yei. Buk ku boi mal una kere kani, tu andret pipti tausen kina (K250,000) boi. 20Embe yei ge Iwa Kerman kandjiye ge yembe ye molo wo er kerman pi.

Dumo Epesus una kunda kaki

21Una God pille pla embe yemaka, are God Murble Pol moi al po djika, Pol embe dji, na dumo kerman Masedonia ne, dumo Akaia wane molo kere, er Jerusalem puno. Na dumo sokara ge wane, are na er Rom po kanno we dji. 22Pol kogo aike yepill iwa soka Timoti ne, Erastus mopill ge Pol wo embe dji, ye asamoll dumo Masedonia po mopellka, na are wono we dji. Dji mal ge soka er pupillka, Pol ege sokarita propins Esia molo pai.

23Kune ge Epesus una Jisas kondwe yei mal pille pla ye moi ge una merke kane man dje pille, pene po yau to kunda kaki. 24Iwa ta moi ge kandjiye Demitrius we dji. Une bisnis ye, ku kerman boi wale silpa ge une i wal beke moi. Une una merke kogo awika, kambono ana god ta kandjiye Artemis we dji ge yene lotuye numb yei mal ge kambono silpa i numb kerker beke ipo ku bolo i, ku kerman kane no embe ye moi. 25Iwa Demitrius yene kogoye una dji womaka, una djell kogo silpa ye moi una kambono dji womaka, kambono porapora makai tomaka une embe dji, kogo taimane yenj una kambono mor ge! Ye kaninj, ku kerman kane nonmon ge nono kogo silpa yenmon al ge pille ku kerman i nonmon we dji. 26Alla Pol yendo mal ye kaninj. Une kandja embe djindo, god kambono una aglene pall bekinj ge god kende mor, god kaima namor we djindo. Alla una merke kani une kandja kaima djindo we dji. Asamoll une propins Esia po kandja ge dje wane una nomane to ke ye awo alla, are une er dumo Epesus mormon al wo kandja ge dje awo, nono nomane para aike ge ye ke ye aundo we dji. 27Une kandja djindo ge kandja soka ke mal djindo. Ta ge nono kogo bisnis kandjiye wopake paro ge une kamblo kal wordaka una wal ke dje kanne paro. Ta kandja kerman pai ge god ana Artemis yene lotuye numb una wal kiwa dje kanne we dji. Propins Esia una porapora mor ge ne, makimb al una porapora molo pinj ge, god ana Artemis kandjiye kerman pai ge pille pla yenj. Ba alla Pol wo kandja djindo ge una pille ana god ge wal kiwa dje kanne ge kune kaima nayendo! we dji.

28Une kandja embe dje kerika una merke ellne kumbsika, yau kerman to embe dji, Epesus una godne Artemis moro ge une kandjiye kerman pandambe! dji. 29Dje to kull woro, kandja kayekaye dji. Dumo Masedonia una soka Gaius ne Aristarkus Pol boll aike wanpill iwa soka ge una po amblo bul dje i er una makai toto yei al pi. 30Pol pakna puno dje yei ba pillgi dji una man dji, ni er namben! we dji. 31Pol ye noi una pende propins Esia una kerman moi ge Pol moi al kandja sigye dje woro embe dji, una makai to mor al ge er pakna namben we dje yembe yei.

32Makai pai ge una kandja dje to kull woro, kandja kayekaye dji. Una merke makai me ge pillpol natoi. 33Juda una wambo napai dje pille, Juda una iwa Aleksander ngundjo ipo una nalene al worma moi. Ga kiye dje moye dje une yene agle pla wori. 34Wori ba una merke moi ge kani Aleksander ge Juda una moro dje kane, yenekne numbkane taimane paika, yau kerman to embe dji, Epesus una godne Artemis moro ge une kandjiye kerman pandambe! dji. Kandja taimane dji kandja ge, alla dje, alla dje pa molmaka awa soka er wo pi.

35Wo er pika dumo Epesus iwa kuskus ta wo kandja djika, una alla kiye dje molmaka embe dji, na kandja djindo ge ye Epesus una pillme! dji. Nono Epesus una wal kerman soka kantau yenmon ge una dumo yemyem pille kane ye keri. Ana kerman Artemis lotoye numb yero ge ne, mapill ku kupill al yage kal toi ge nono boll yero, una ta man djinda ba kondwe nayero, una kane kerinj. Embe pille, ye gokgak dje, kunda yembon dje nayene! 37Ye iwa soka iwo no una kerman mopin al wori ba, soka ke ta nayepill. Nono godne Artemis lotuye numb yero ge soka numog po wal kunumb nanopill, Artimus kandjiye ge kamblo kal naworpill we dji. 38Iwa Demitrius ne, wal silpa bekinj una ga boll kandja ta pai dal, kambono po una kot djinj al ge djineke, mestret kambono kot piye we dji. 39Ye kandja ta pai dal, ye kot panda al po djine. 40Ipon nono aulaul yepin ge una po djineke, Rom una kerman ta pi dal, nono abye paro. Kambono embe djine, ye una mor ge me namba mal pai pille makai to molo, yau to kallgane i ne? djine. Alla, nono kandja ta dje yem worbon naparo we dji. 41Une kandja embe dje kere una dje wori er djelldjell pi.